मराठी तितुका मेळवावा

महाराष्ट्र शासनाच्या मराठी भाषा विभागाने मराठी भाषेचा प्रचार व प्रसार करण्याच्या उद्देशाने जगभरातील मराठी भाषिक प्रतिनिधींना एकत्र आणून दि. २७ ते २९ जानेवारी दरम्यान वाशी, नवी मुंबई येथे ‘विश्व मराठी संमेलन २०२४’ आयोजित केले होते.

ह्या संमेलनात महाराष्ट्र मंडळ म्युनिक, कार्यकारिणी समिती २०२३ मधील योगेश वाडकर, कृतार्थ धामणकर, अद्वैत खरे, केदार जाधव तसेच ‘शिवप्रतिष्ठान म्युनिक’ तर्फे संदीप मुसळे व राहुल जोशी यांनी सहभाग घेतला. जर्मनीमधील इतर मंडळे त्याचबरोबर जगभरातील विविध मराठी भाषिक संघटनांनी यामध्ये सहभाग घेतला होता.

मराठी भाषा व शालेय शिक्षण खात्याचे मंत्री श्री. दीपकजी केसरकर यांच्या विशेष पुढाकाराने हा भव्य सोहळा आयोजित करण्यात आला होता.

महाराष्ट्राचे राज्यपाल श्री. रमेश बैस, मुख्यमंत्री श्री. एकनाथजी शिंदे, उपमुख्यमंत्री श्री. देवेंद्रजी फडणवीस, शालेय शिक्षण व मराठी भाषा मंत्री श्री. दीपकजी केसरकर, मराठी भाषिकांचा बुलंद आवाज असलेले श्री. राज ठाकरे अशा अग्रगण्य व्यक्तींनी या ठिकाणी आपले विचार व्यक्त केले. त्याचबरोबर लाभलेले पद्मविभूषण डॉक्टर रघुनाथ माशेलकर यांसारख्या दिग्गज मराठी शास्त्रज्ञ व विचारवंतांचे मार्गदर्शन ही या संमेलनातील स्मरणीय बाब !

अतिशय उत्कृष्ट असे सांस्कृतिक कार्यक्रम त्याचबरोबर मराठी भाषा संबंधित अनेक महत्त्वाच्या मुद्द्यांवर चर्चा, परिसंवाद हे संमेलनाचे वैशिष्ट्य म्हणता येईल. जगभर स्थायिक असलेल्या मराठी माणसाबरोबरच मराठी भाषेची व्याप्ती वाढत आहे आणि ही व्याप्ती म्हणजे मराठी भाषेच्या प्रवासातील एक महत्त्वाचा टप्पा आहे याची नोंद या संमेलनाच्या निमित्ताने घेण्यात आली.

तीन दिवसांच्या ह्या कार्यक्रमात मंडळातर्फे सहभागी झालेल्या सर्वांना अतिशय चांगला आणि समृद्ध करणारा अनुभव आला. अनेक ख्यातनाम कलाकार, अभ्यासक, भाषा विभागातील शासकीय अधिकारी, पत्रकार, विविध सामाजिक संस्थांचे प्रतिनिधी अशा अनेकांना
भेटण्याची, संवाद साधण्याची संधी या निमित्ताने मिळाली. त्याचबरोबर महत्त्वाचे म्हणजे जगभरात पसरलेल्या महाराष्ट्र मंडळांच्या प्रतिनिधींना भेटून विविध उपक्रमाबद्दल माहितीची देवाण-घेवाण करता आली. संमेलनात महाराष्ट्र मंडळाचे अध्यक्ष योगेश वाडकर व मंडळाच्या ‘माय मराठी’ या शालेय उपक्रमाचे प्रमुख राहुल जोशी, मराठीतून जर्मन शिकवण्याच्या उपक्रमाविषयी केदार जाधव, तसेच शिवप्रतिष्ठान म्युनिकतर्फे संदीप मुसळे यांनी आपले मनोगत व्यक्त केले.

मराठी भाषेसंबंधी झालेले आणि विशेषतः सद्य परिस्थितीचा आढावा घेणारे, तसेच भविष्याच्या वाटचालीचा विचार करणारे परिसंवाद महत्त्वाचे म्हणता येतील. त्याचबरोबर संमेलनातील काही सांस्कृतिक कार्यक्रम तर अगदी मंत्रमुग्ध करणारे होते !

जर्मनीत अग्रणी असलेल्या ‘महाराष्ट्र मंडळ म्युनिक’ ने गेली अनेक वर्षे महाराष्ट्रातील सांस्कृतिक कार्यक्रम त्याचबरोबर ग्रंथालय, दिवाळी अंक, मराठी शाळा, ‘म्युनिक नाट्यरंग’ अशा विविध उपक्रमांमधून मराठी भाषेच्या या वैश्विक प्रवासात उत्साही सहभाग घेतलेला आहे.

मंडळाच्या सदस्यांच्या या विश्व मराठी संमेलनातील अनुभवाचा महाराष्ट्र मंडळाच्या पुढील वाटचालीत निश्चितच फायदा होईल.

या संपूर्ण विश्व मराठी संमेलनाचे दृकश्राव्य चित्रण हे युट्युब वर उपलब्ध आहे. थोर मराठी साहित्यिक श्री. विष्णू वामन शिरवाडकर (‘कुसुमाग्रज’) यांच्या जयंतीनिमित्त साजरा केल्या जाणाऱ्या मराठी भाषा गौरव दिनानिमित्त ‘महाराष्ट्र मंडळ म्युनिक’ च्या सर्व सभासदांना याचा लाभ घेता यावा म्हणून संपूर्ण कार्यक्रमाच्या संकलित केलेल्या यूट्यूब लिंक्स उपलब्ध करून देताना आम्हाला विशेष आनंद होत आहे !

महाराष्ट्रातील अतिशय समृद्ध असे लोककलेचे प्रकार, संगीत, नृत्य या सर्वांनी नटलेल्या कार्यक्रमाच्या या लिंक्स आपल्या आप्तस्वकीयांपर्यंत आवर्जून पोचवाव्यात.

आपल्या मायबोलीच्या या विशेष सोहळ्याचा आपण सर्वांनी आस्वाद घ्यावा आणि मराठी भाषेच्या संवर्धनासाठी मंडळाच्या कार्यक्रम व उपक्रमांमध्ये उत्साही सहभाग घ्यावा हीच अपेक्षा !